सगरमाथा र पाटेबाघ अंकित ५०० रुपैयाँका ३० लाख थान नयाँ नोट सार्वजनिक

काठमाडौं- नेपाल राष्ट्र बैंकले पाँच सय रुपैयाँ दरका नयाँ नोट बुधबारदेखि चलनचल्तीमा ल्याएको छ। बैंकले सूचना जारी गर्दै गभर्नर प्रा. डा. विश्वनाथ पौडेलको हस्ताक्षर रहेका नयाँ नोट प्रचलनमा आएको जनाएको हो। राष्ट्र बैंकका अनुसार नयाँ नोट साविककै आकार, रङ र डिजाइनमा रहेका छन्। संकेत नम्बर झ३८ ०००००१ देखि ट८३ ९९९९९९ सम्मका नोट चलनचल्तीमा ल्याइएको छ।

नेपाली नोटको नम्बरिङ प्रणालीअनुसार संकेतका अक्षरहरू क्रमशः क, ख, ग हुँदै अगाडि बढ्ने व्यवस्था छ। यसपटक प्रयोग गरिएका झ, ञ र ट संकेतअन्तर्गत प्रत्येक सिरिजमा ०००००१ देखि ९९९९९९ सम्मका करिब १० लाख थान नोट छापिएका छन्। यसअनुसार पाँच सय रुपैयाँ दरका कुल ३० लाख थान नयाँ नोट बजारमा पठाइएको राष्ट्र बैंकले जनाएको छ।