काठमाडौँ उपत्यकाकै बाढीपीडितले पाएनन् राहत, भन्छन्, 'सोध्न आउँछन्, राहत लिएर कोही आउँदैनन्'

काठमाडौँ। 'तपाईंहरु हामीलाई राहत दिन आउनुभएको हो ?' बाढीपीडितको अवस्थाबारे स्थलगत रिपोर्टिङ गर्न जाँदा ललितपुर महानगरपालिका–२५ फूलबारीमार्ग बस्ने सविता माझीको प्रश्न थियो यो।

'होइन नी हामी त तपाईंहरुको अवस्थाबारे रिपोर्टिङ गर्न आएको ।' यो जवाफले एक्कासी अध्याँरो मुहार लगाएर माझीले भनिन्, 'ए, म त खानेकुरा दिन कोही आएछ कि भनेर नी ।' काखमा छ महिनाकी दूधेबालक च्यापेर कोही राहत दिन आएको हो की भन्ने आशाले बाटो निहालिरहेकी थिइन् उनी । तर हामी राहत बाँड्ने मान्छे नभएको थाहा पाएपछि उनले भनिन्, 'अरु पनि आउँछन् यसरी नै । सोधेर जान्छन् । तर कोही राहत लिएर आउँदैनन् ।'