फैलिँदो डिजिटल युग खुम्चिँदो प्रेस

हरेक वर्ष मे ३ लाई विश्व प्रेस स्वतन्त्रता दिवसका रूपमा विश्वभर मनाइन्छ। यस वर्ष पनि नेपालसहित विश्वका विभिन्न मुलुकमा स्वतन्त्र र निष्पक्ष सञ्चारमाध्यमको महत्त्वबारे छलफल गर्दै यो दिवस मनाइयो तर विश्व प्रविधि र राजनीतिक रूपमा अगाडि बढ्दै जाँदा प्रेस स्वतन्त्रतामाथि हुने आक्रमण केवल भौतिक क्षेत्रमा मात्र सीमित छैन, अहिले अझ बढी डिजिटल क्षेत्रमा पनि बढ्दो रूपमा देखिन थालेको छ। आजको समयमा मानवअधिकार, पारदर्शिता र लोकतन्त्रको संरक्षणका लागि प्रेस स्वतन्त्रताको रक्षा अत्यन्त आवश्यक बनेको छ।

विश्वव्यापी रूपमा प्रेस स्वतन्त्रता पछिल्लो २५ वर्षकै सबैभन्दा न्यून अवस्थामा पुगेको बताइएको छ। धेरै देशमा पत्रकारहरूले कठिन तथा अत्यन्त जोखिमपूर्ण अवस्थामा काम गर्न बाध्य भएका छन्। रिपोर्टर्स विदआउट बोर्डर्स (आरएसएफ) ले सन् २००२ देखि विश्व प्रेस स्वतन्त्रता सूचकांक सार्वजनिक गर्दै आएको छ । यस वर्ष पनि आरएसएफले १८० देशलाई सञ्चारमाध्यमको बहुलता, स्वतन्त्रता, पत्रकारको सुरक्षा तथा सञ्चार क्षेत्रको कानुनी, आर्थिक र सामाजिक–सांस्कृतिक अवस्थाका आधारमा मूल्यांकन गरेको छ।