पोखराको फिर्के करिडोर सजाउन ६२ करोडको परियोजना

पोखराको मध्य सहर भएर बग्दै आएको फिर्के खोला मिचेर बनाइएका संरचनामाथि डोजर लगाएलगत्तै पोखरा महानगरपालिकाका मेयर धनराज आचार्यले सामाजिक सञ्जालमा एउटा तस्बिर पोष्ट गरे। फिर्के करिडोरलाई तस्बिरमा देखाएजस्तै सुन्दर र स्वच्छ बनाउने योजना अनुसार नै डिजाइन गरेको मेयर आचार्यले उल्लेख गरेका छन्।

‘यो परिकल्पना केवल खोला संरक्षणको योजना मात्र होइन, पोखरालाई ‘हरित, स्वच्छ, आधुनिक र विश्वस्तरीय नदी–करिडोर शहर’ का रुपमा स्थापित गर्ने दूरदर्शी अभियान हो,’ उनले भनेका छन्। पोखरा महानगरपालिका– १८ अधेरिकुनादेखि सुरु भएर पोखराका २, ४, ५, ७, ८ नम्बर वडा हुँदै पोखरा–६ फेवाताल–गाईघाटसम्म फैलिएको ८ किमि लामो फिर्के खोलालाई प्राकृतिक सौन्दर्य, पर्यावरणीय सन्तुलन, पर्यटन र नागरिक जीवनशैलीसँग जोडेर नयाँ शहरी पहिचान दिने लक्ष्य राखिएको उनले बताए।