५७ वर्षे नेविसंघको आयु कति ?

वि.सं. २०२७ वैशाख ६ गते औपचारिक रुपमा स्थापना भएको नेपाली कांग्रेसको विद्यार्थी संगठन नेपाल विद्यार्थी संघ ५७औँ वर्षमा हिँडिरहेको छ । कुनै समयमा एकदमै दौडिरहेको नेविसंघ यति बेला कछुवा गतिमा छ । जेनजी आन्दोलन पश्चात्को नेपालको राजनैतिक घटनाक्रम, त्यसका अलावा नेपाली कांग्रेस भित्र भएको विशेष महाधिवेशन, वर्तमान सरकारले विद्यार्थी राजनीतिको सन्दर्भमा राखेको धारणाको प्रत्यक्ष प्रभाव मात्र होइन ०७३ मा भएको ११औँ महाधिवेशन पश्चात् मनोनीतको भरमा नेविसंघले श्वास फेरिरहेको छ । यसले नेविसंघमा संगठन र हकहित सन्दर्भमा सक्रियता भन्दा पनि नेताको पहुँचबाट नेता जन्माइरहेको छ ।

अहिलेसम्म २८ पटक सर्भिसिङ हुनुपर्ने नेविसंघ ११ पटकमा सीमित छ । ०७६ सालमा राजीव ढुंगाना महाधिवेशन गर्ने जिम्मेवारीसहित अध्यक्ष पदमा मनोनीत भए, जिम्मेवारी पूरा गर्न नसकेपछि ०७८ मा दुजाङ शेर्पाले जिम्मेवारी पाए । उक्त समितिले पनि ५ वर्षसम्म महाधिवेशन गर्न सकेन । अन्ततः नेविसंघको इतिहासमा अहिले पहिलो महिला अध्यक्षका रुपमा करुणा कटुवाल तदर्थ समितिको अध्यक्षमा मनोनीत भएकी छन् ।