एक महिनामा समस्याग्रस्त सहकारीका १४ सय बचतकर्ताको रकम फिर्ता

काठमाडौं । समस्याग्रस्त सहकारी व्यवस्थापन समितिको कार्यालयले एक महिनामा १४ सय जना साना बचतकर्ताको रकम फिर्ता गरेको छ । समितिले जेठ महिनाको प्रगति विवरण सार्वजनिक गर्दै १ हजार ४ सय ५२ जनाको रकम फिर्ता गरिएको जानकारी दिएको हो ।

समितिले सार्वजनिक गरेको विवरण अनुसार जेठ महिनामा ८ वटा समस्याग्रस्त सहकारीका कुल एक हजार ४५२ जना बचतकर्ताहरूलाई ५९ लाख ४ हजार ६८९ रुपियाँ बचत फिर्ता भएको छ । फिर्ता गरिएको यो रकम मुख्यतया १० हजारभन्दा मुनिका बचतकर्ताहरूको हो ।

Advertisement

बचत फिर्ता गरिएका सहकारीहरूमा कृषि विकास बहुउद्देश्यीय, कान्तिपुर सेभिङ एण्ड क्रेडिट, पशुपति सेभिङ, नागरिक कल्याण, ओरिएन्टल को–अपरेटिभ, गोरखा सेभिङ, शिव शिखर र लालिगुराँस बहुउद्देश्यीय सहकारी रहेका छन् । यी सहकारीका ऋणीहरूबाट असुल भएको रकमबाट दाबीकर्ताहरूलाई दाबी भुक्तानी गरिएको समितिले जनाएको छ ।

त्यसैगरी, यस महिना समितिले ऋण असुलीतर्फ पनि सफलता प्राप्त गरेको छ । १२ वटा समस्याग्रस्त सहकारीका ऋणीहरूबाट कुल एक करोड २० लाख ४६ हजार रुपियाँ ऋण असुली भएको समितिले उल्लेख गरेको छ । यसैगरी, १२२ जना बचतकर्ताको ५१ लाख ५१ हजार रुपियाँ बराबरको बचत मिलान समेत गरिएको छ ।

बचत मिलान र ऋण असुली भएका सहकारीहरूमा ओरिएन्टल, तुलसी, कृषि विकास, आइडियल यमुना, शिव शिखर, स्ट्याण्डर्ड सेभिङ, लालिगुराँस, कान्तिपुर, गौतमश्री, पशुपति, गोरखा र नेपाल सहकारी वित्तीय संस्था रहेका छन् ।

साथै, बचत फिर्ताका लागि भेरिफिकेसन गर्न बाँकी रहेका करिब ४४ हजार मागदाबी निवेदनहरूको चरणबद्ध रूपमा छानबिन भइरहेको छ । बचतकर्ताको मागदाबी रुजु तथा संशोधन गर्न छुट्टै हेल्प डेस्क समेत सञ्चालनमा ल्याइएको छ ।

समस्याग्रस्त सहकारीका सञ्चालक, व्यवस्थापक र पूर्व सञ्चालकहरूको नाममा रहेको सम्पत्ति खोजी गर्न रणनीतिक योजनासहित टोली परिचालन गरिएको समितिले उल्लेख गरेको छ । ऋणीहरूको ऋण दायित्व गणनाका लागि सफ्टवेयर विकास गरी कर्मचारीलाई तालिम दिने कार्य सुरु भएको छ ।

समितिको कार्यालयमा कार्यरत कर्मचारीहरूको नयाँ संगठनात्मक संरचना स्वीकृत गरी जिम्मेवारी बाँडफाँड गरिएको छ । त्यसैगरी, जेठ महिनामा मात्रै समितिका १६ वटा बैठकहरू सम्पन्न भई १८९ वटा विभिन्न निर्णयहरू गरिएका छन् ।

समितिले हाल अनलाइन मागदाबी प्रणालीमा सुधार गर्दै बचतकर्ताले आफैँ आफ्नो मागदाबीको अवस्था हेर्न मिल्ने गरी प्रविधिमा सुधार गरिरहेको समेत जानकारी दिएको छ । समस्याग्रस्त सहकारीका ऋणीहरूको पहिचान गरी रोक्का राख्ने र उनीहरूको तीनपुस्ते विवरण तयार गर्ने कार्यलाई पनि तीव्रता दिइएको प्रगति प्रतिवेदनमा उल्लेख छ ।