दुई दिने सार्वजनिक बिदाले होटल व्यवसायी उत्साहित, सरकारी कार्यक्रम होटलमा नगर्ने नीति सच्याउन माग

काठमाडौं– हालै सरकारले सार्वजनिक बिदा दुई दिन कायम गरेपछि होटल तथा पर्यटन व्यवसायमा सकारात्मक प्रभाव देखिन थालेको छ । व्यस्त जीवनशैलीका कारण मानिसहरूलाई परिवारसँग समय बिताउन र घुमफिर गर्न पर्याप्त अवसर मिलिरहेको थिएन । दुई दिने बिदाको व्यवस्थाले आन्तरिक पर्यटनलाई प्रोत्साहित गर्दै होटल व्यवसाय पनि चलायमान भएको छ ।

दुई दिनको सार्वजनिक बिदाले होटल व्यवसायमा ग्राहकको चाप बढेसँगै आम्दानीमा पनि सुधार आएको छ । विशेषगरी पोखरा, चितवन, लुम्बिनी, नगरकोट, इलाम लगायतका पर्यटकीय क्षेत्रका होटलमा बुकिङ बढेको देखिन्छ । यसले होटल व्यवसायीलाई सेवा विस्तार गर्न र गुणस्तर सुधार गर्न प्रेरित गरेको छ । साथै, यसले कोरोनाको समयमा रोजगारी गुमाएकाहरूले पनि पुनः अवसर पाएका छन् ।