डिजिटल सुरक्षा, रोजगारीदेखि मानसिक स्वास्थ्यसम्म युवाका एजेण्डा सार्वजनिक

सुदूरपश्चिम प्रदेश सभाका सदस्य तथा सामाजिक विकास समितिका सभापति धर्मराज पाठकले युवाको सक्रिय सहभागिताले समाज र राष्ट्र निर्माणमा सकारात्मक ऊर्जा थप्ने बताउनुभएको छ । सुदूरपश्चिम प्रदेश युवा सम्मेलन २०२६ को समापन कार्यक्रमलाई सम्बोधन गर्दै उहाँले युवाका सवाललाई छलफलमा मात्र सीमित नराखी नीति निर्माणको तहसम्म पुर्‍याउन आवश्यक रहेको उल्लेख गर्नुभयो ।

डिजिटल सुरक्षा, मानसिक स्वास्थ्य, रोजगारी र जलवायु न्यायजस्ता विषय आजका युवाका प्रमुख चासोका क्षेत्र भएकाले राज्यले पनि यस्ता मुद्दालाई प्राथमिकताका साथ सम्बोधन गर्नुपर्ने उहाँले बताउनुभयो । युवामा राजनीतिक चेतनाको विकास गर्नु आजको आवश्यकता भएको उल्लेख गर्दै सभापति पाठकले युवाले निराशा मात्र होइन, समाजमा रहेका सम्भावनाका पक्षलाई पनि उजागर गर्न सक्नुपर्नेमा जोड दिनुभयो ।