मधेस सरकारमा निर्णायक नेकपाको ‘बार्गेनिङ’– अर्थ मन्त्रालय नदिए प्रतिपक्षसँग सरकार बनाउँछौँ

जनकपुरधाम । मधेस प्रदेशका मुख्यमन्त्री कृष्णप्रसाद यादवले गएको शुक्रबार मात्रै विश्वासको मत लिएका हुन् । गत वैशाख २३ गते जनमत पार्टीले सरकारबाट सर्मथन फिर्ता लिएपछि मुख्यमन्त्री यादवले संवैधानिक व्यवस्थाअनुसार विश्वासको मत लिएका हुन् ।

जनमतले सरकारबाट सर्मथन फिर्ता लिएपछि मधेस प्रदेश सरकारको सत्तासमीकरण पनि बदलिएको छ । नेपाली कांग्रेसको नेतृत्वमा रहेको मधेस सरकारलाई नेकपा एमाले र नेपाली कम्युनिस्ट पार्टी (नेकपा) समर्थन गरेको छ ।

तर, मधेस प्रदेश सरकार पुनः संकटमा पर्ने संकेत देखिन थालेको छ । मन्त्रालय बाँडफाँटमा सत्तासाझेदार दलबीच कुरा नमिल्दा सरकार संकटमा पर्ने संकेत देखिन थालेको नेकपाका एक प्रदेश सांसदले जानकारी दिए ।

उनका अनुसार, वर्तमान सरकारमा निर्णायक रहेका नेकपाले मन्त्रिपरिषद् विस्तारमा असन्तुष्टि जनाएका छन् । सोहीकारण हालसम्म मन्त्रिपरिषद् विस्तार हुन सकेको छैन । नेकपाले मुख्यमन्त्री यादवसँग अर्थ मन्त्रालय माग गरिरहेको छ । तर, मुख्यमन्त्री यादवसँगै सत्ता साझेदार दल नेकपा (एमाले) अर्थ मन्त्रालय नेकपालाई दिन तयार छैनन् । अर्थ नपाए नेकपा प्रतिपक्षी दलसँग सरकार बनाउने तयारीमा छ ।

यस विषयमा मुख्यमन्त्री यादवसँग छलफल भए पछि सहमति हुन नसकेको नेकपाका एक सांसदले बताए । सहमति नभएपछि प्रतिपक्ष दलसँग मिलेर आफ्नै नेतृत्वमा सरकार बनाउने तयारी रहेको ती सांसदले सुनाए । अहिले नेकपा तीन मन्त्रालयसहित सरकारमा सहभागी छ ।

गएको शुक्रबार मुख्यमन्त्री यादवले मधेस प्रदेशसभाबाट विश्वासका मत प्राप्त गरेका थिए । गएको बिहीबार नै सत्ता साझेदार दल जनता समाजवादी पार्टी (जसपा) नेपाललाई सरकारबाट निकालेर नेकपा एमालेलाई सरकारमा भित्र्याएका थिए । मुख्यमन्त्री यादवले जसपालाई सरकारबाट निकालेर कांग्रेस, नेकपा एमाले र नेकपा गठबन्धनको सरकार बनाएको थियो ।

#नेकपा

#मुख्यमन्त्री

#मधेस प्रदेश

#कृष्णप्रसाद यादव