माइजोगमाईमा ‘रैथाने गाथा’ सम्पन्न

इलामको माइजोगमाई गाउँपालिकामा स्थानीय कला, संस्कृति, साहित्य र इतिहासको संरक्षण तथा प्रवद्र्धन गर्ने उद्देश्यले आयोजित ‘माइजोगमाई रैथाने गाथा’ कार्यक्रम भव्य रूपमा सम्पन्न भएको छ। माइजोगमाई सेवा समाजको आयोजनामा जेठ ३० गते सम्पन्न सांस्कृतिक महाकुम्भमा विभिन्न जातीय समुदायको सहभागिता, बौद्धिक बहस तथा सम्मान कार्यक्रम मुख्य आकर्षण बनेका थिए।

कार्यक्रमको सुरुवात नयाँ बजार क्षेत्रमा आयोजित बहुजातीय सांस्कृतिक झाँकी तथा र्‍यालीबाट गरिएको थियो। राई, लिम्बू, बाहुन, गुरुङ, शेर्पा, लेप्चालगायत विभिन्न समुदायले आफ्नो मौलिक भेषभूषा र सांस्कृतिक पहिचान झल्काउने प्रस्तुतिसहित सहभागिता जनाएका थिए। लिम्बू समुदायको च्याब्रुङ बाजासहितको र्‍याली र ‘केलाङ’ नृत्यले विशेष आकर्षण थपेको थियो।