सुनकोसी नदीमा डुबेर दुई बालकको मृत्यु

सिन्धुलीको सुनकोसी गाउँपालिका–५ सित्खास्थित सुनकोसी नदीमा नुहाउने क्रममा आइतबार दिउँसो डुबेर दुई बालकको मृत्यु भएको छ। मृत्यु हुनेमा सुनकोसी गाउँपालिका–४ घर भई हाल वडा नं. ३ बोहोरेटार बस्दै आएका दलबहादुर पुलामी मगरका ९ वर्षीय छोरा सफल पुलामी मगर र सोही ठाउँ बस्दै आएकी सरिता विकका १० वर्षीय छोरा युकेस विक हुनुहुन्छ ।

जिल्ला प्रहरी कार्यालय सिन्धुलीका प्रहरी निरीक्षक अजयकुमार कुशवाहाका अनुसार अपराह्न करिब ३ बजे स्थानीय गोठालाले नदीको छुट्टिएको सानो भँगालो किनारमा दुई बालक नुहाइरहेको देखेका थिए । त्यसको केही समयपछि एक जना बालक पानीमा डुबेको र अर्का एक जना बगेजस्तो देखिएपछि तत्काल प्रहरी चौकी सित्खा (रामेछाप) मा खबर गरेका थिए ।