कर्मचारीको तलब प्रतिमहिना एक लाख २१ हजारसम्म दिन प्रस्ताव

सरकारका मुख्यसचिव सुमनराज अर्यालको संयोजकत्वमा गठित कर्मचारीको तलबभत्ता पुनरावलोकन समितिले न्यूनतम तलब स्केल ३५ हजार र अधिकतम एक लाख २१ हजार रुपैयाँ हुने गरी बढाउन सिफारिस गरेको छ । समितिले तयार पारेको प्रतिवेदनमा यस्तो सिफारिस गरिएको छ ।

मुख्यसचिव अर्यालले भने, ‘कर्मचारीहरुको तलब बढाउन सिफारिस गर्दै हामीले अर्थमन्त्री डा. स्वार्णिम वाग्लेलाई प्रतिवेदन बुझाइसकेका छौं ।’ उनले सिफारिसअनुसार तलब बढ्ने/नबढ्ने विषयमा भने आफू जानकार नभएको बताए । समितिले कार्यालय सहयोगीको तलब न्यूनतम ३५ हजार र मुख्यसचिवको तलब एक लाख २१ हजार रुपैयाँ हुनेगरी बढाउन सिफारिस गरेको हो । हाल कार्यालय सहयोगीको २७ हजार ६१२ र मुख्यसचिवको ७७ हजार २११ रुपैयाँ तलब छ ।