हालान्डका लागि कुनै मञ्च ठूलो छैन

बोस्टन । अर्लिङ हालान्डका लागि कुनै मञ्च निकै ठूलो छ भने, हामीले त्यसलाई अहिलेसम्म फेला पारेका छैनौँ।

रेडबुल साल्जवर्गबाट च्याम्पियन्स लिग डेब्युमा ह्याट्रिक, बोरुसिया डर्टमन्डबाट बुन्डेसलिगा डेब्युमा ह्याट्रिक, म्यानचेस्टर सिटीबाट प्रिमियर लिग डेब्युमा दुई गोल गरेका उनले अब विश्वकपको डेब्यु खेलमा पनि दुई गोल गर्दै नर्वेलाई इराकमाथि ४-१ को सानदार जित दिलाएका छन्।

सन् २०२६ को विश्वकप सुरु भएको छ दिन भइसक्यो। तर, मंगलबार किलियन एम्बाप्पेले दुई उत्कृष्ट गोल गर्दै फ्रान्सलाई सेनेगलमाथि ३-१ को जित दिलाएपछि मात्र विश्वकप साँच्चै सुरु भएको महसुस भयो। ती गोलहरूसँगै एम्बाप्पे फ्रान्सका लागि सर्वकालीन सर्वाधिक गोलकर्तासमेत बनेका छन्।

त्यसको एक घण्टा नबित्दै, हालान्ड आफ्नो पहिलो विश्वकप खेलका लागि मैदानमा उत्रिए। उनले आफूभन्दा १८ महिना जेठा एम्बाप्पेले दिएको चुनौतीलाई स्वीकार्दै उत्साहजनक प्रदर्शन गरे र हामीले अपेक्षा गरेजस्तै गोल पनि गरे।

खेलपछि नर्वेका प्रशिक्षक स्टेल सोल्बाकेनले भने, ‘तपाईंले देख्न सक्नुहुन्छ उनले अवसरको भरपुर सदुपयोग गरे, यो मञ्च उनका लागि ठूलो थिएन। खेलअघि नै मलाई राम्रो अनुभूति भइरहेको थियो, अन्तिम प्रशिक्षण सत्र निकै राम्रो भएको थियो। आज उनले हाम्रा लागि केही गर्छन् भन्ने मलाई लागिरहेको थियो।’

इराकका मुख्य प्रशिक्षक ग्राहम अर्नोल्डले थपे, ‘उनी साँच्चै उत्कृष्ट नम्बर नौ हुन्। हामीले खेलको धेरैजसो समय उनलाई राम्रैसँग रोकेका थियौँ, तर अन्ततः उनी एक अब्बल स्ट्राइकर हुन्। नर्वेसँग भएको टोलीले धेरैलाई चकित पार्न सक्छ। उनीहरू यो प्रतियोगितामा निकै अगाडिसम्म जान सक्छन्।’

अन्तिम सिट्ठी बजेपछि अर्नोल्डले हालान्डसँग कुराकानी गरेका थिए। उनले खुलासा गर्दै भने, ‘मैले उनलाई यति मात्र भनेँ, मैले अहिलेसम्म देखेका उत्कृष्ट स्ट्राइकरहरूमध्ये तिमी एक हौ। उनी निकै बलिया छन्, निकै छरितो छन् र उनी खतरनाक छन्।’

‘गोल उनैबाट हुनु थियो’

पहिलो हाफमा हालान्डले अन्य खेलाडीभन्दा सबैभन्दा कम, मात्र ११ पटक बल छोएका थिए। तर, खेलको ३० मिनेट पुग्नुअघि नै बायाँतर्फबाट डेभिड मोलर उल्फले दिएको उत्कृष्ट क्रसलाई ट्याप इन गर्दै गोल गरेपछि उनको प्रभाव अतुलनीय रह्यो। यो १० हजार २ सय २० दिनपछि विश्वकपमा नर्वेको पहिलो गोल थियो। यसअघि नर्वेले सन् १९९८ मा विश्वकपमा गोल गरेको थियो। सो गोल हालान्ड जन्मिनुभन्दा ७ सय ५९ दिनअघि भएको थियो।

बीबीसी वानमा बोल्दै सह-कमेन्टेटर स्टेफन वार्नोकले भने, ‘एउटा कुरा के पक्का छ भने हालान्डले बललाई भेट्टाउनेछन्, गोल गर्नका लागि उनले जे पनि गर्नेछन्। उनको स्तरको खेलाडीका लागि यो निकै सहज फिनिसिङ थियो। गोल उनैबाट हुनु थियो।’

इराकका आयमेन हुसेनले हालान्डकै शैलीमा उत्कृष्ट हेडरमार्फत गोल गर्दै खेललाई केही समयका लागि बराबरीमा ल्याएका थिए। तर, विपक्षी खेलाडीले दिएको ब्याकपासलाई निरन्तर पछ्याएका २५ वर्षीय हालान्डले त्यसको प्रतिफल पाए। इराकी गोलरक्षक जलाल हसनले बल क्लियर गर्न ढिलाइ गर्दा हालान्डले त्यसलाई रोक्दै सिधै जाली चुमाए।

विश्वकप इतिहासकै ५५औँ ह्याट्रिक हुने पक्काजस्तै देखिएको थियो। तर, खेलको अन्त्यतिर विपक्षीको खराब पासमा बल खोस्दै प्रहार गरेको बललाई गोलरक्षक जलालले रोकिदिए। त्यस्तै, अतिरिक्त समयमा हालान्डले प्रहार गरेको हेडरलाई बचाउने क्रममा इराकका हुसेनले आफ्नै पोस्टमा गोल गर्न पुगे।

यस विश्वकपको आफ्नो पहिलो खेलमै दुई गोल गर्ने हालान्ड छैटौँ खेलाडी हुन्।

वार्नोकले थपे, ‘यो प्रतियोगितामा नर्वे कति अगाडिसम्म पुग्छ भन्ने कुरामा उनी निर्णायक खेलाडी बन्न सक्छन्।’

‘नर्वे उनका लागि कति महत्त्वपूर्ण छ भन्ने प्रस्ट देखिन्थ्यो’

हालान्डले अब नर्वेका लागि ५१ खेलमा ५७ गोल गरिसकेका छन्। उनको प्रतिखेल गोल अनुपात पश्चिम जर्मनीका महान् खेलाडी गर्ड मुलर र हंगेरीका स्यान्डोर कोक्सिसको भन्दा बढी छ।

वास्तवमा, अन्तर्राष्ट्रिय स्तरमा कम्तीमा ५० गोल गर्ने खेलाडीहरूमध्ये उनको यो अनुपात दोस्रो उत्कृष्ट हो।

सन् १९१० र १९२० को दशकमा डेनमार्कका पौल निल्सेनले मात्र उनीभन्दा छिटो गोल गरेका थिए। निल्सेनले ३८ खेलमा ५२ गोल गरेका थिए।

आफ्नो देशका लागि ५२ गोल गरेकी इङ्ल्यान्डकी पूर्व स्ट्राइकर एलेन ह्वाइटले बीबीसी वानमा भनिन्, ‘पेनाल्टी बक्स वरपर हालान्डको स्तर र शारीरिक बल अर्कै तहको थियो। उनी यस प्रतियोगिताको सर्वाधिक गोलकर्ता बन्न चाहन्छन्।’

वेल्सका पूर्व डिफेन्डर एस्ले विलियम्सले थपे, ‘मलाई सबैभन्दा प्रभावित पारेको कुरा उनको इच्छाशक्ति हो। उनले जसरी दबाब सिर्जना गरिरहेका थिए र गाह्रो कामहरू गरिरहेका थिए, त्यसबाट नर्वे उनका लागि कति महत्त्वपूर्ण छ भन्ने प्रस्ट देखिन्थ्यो।

‘म्यानचेस्टर सिटीका लागि खेल्दाभन्दा आज उनले नर्वेका लागि धेरै मिहिनेत गरेको मेरो बुझाइ छ। यदि आलोचना नै गर्ने हो भने, कहिलेकाहीँ उनी म्यानचेस्टर सिटीमा अलि शान्त देखिन्छन्।

‘आज उनले नेतृत्वदायी भूमिका निर्वाह गरे, टोलीलाई अगाडि बढाइरहेका थिए। उनीसँग भएको राम्रो फिनिसिङ मात्र नभएर यो एउटा उत्कृष्ट अलराउन्ड प्रदर्शन थियो र आफ्नो टोली विश्वकपमा हुनु उनको लागि कति अर्थ राख्छ भन्ने कुरा तपाईंले देख्न सक्नुहुन्छ।’