मधेस प्रदेश र चीनको युनान प्रान्तबिच भगिनी सम्बन्ध बनाउन सीके राउतको प्रयास

काठमाडौँ । जनमत पार्टीका अध्यक्ष डा.सीके राउतले मधेस प्रदेश र चीनको युनान प्रान्तबिच भगिनी सम्बन्ध स्थापना गर्नका लागि चिनियाँ अधिकारीसँग छलफल गरेका छन् ।

चीन भ्रमणका क्रममा आफूले युनान प्रदेशका अधिकारीहरूसँग छलफल गरेको अध्यक्ष राउतले जानकारी दिए । युनान प्रान्तका महानिर्देशकसँग छलफल गरी यसको प्रक्रिया अगाडि बढाउन सहमति गरेको जनमत पार्टी स्रोतले जनाएको छ ।

मधेस प्रदेशमा जनमत पार्टी नेतृत्वको सरकार छ । आफ्नै पार्टीले प्रदेश सरकारको नेतृत्व गरेका कारण राउतले चीन भ्रमणका क्रममा युनान प्रान्तसँग मधेस प्रदेशको भगिनी सम्बन्ध स्थापनाका लागि पहल गरेका हुन् ।

भगिनी सम्बन्ध स्थापना गर्नका लागि दुई पक्षका बिच कुराकानी भइसकेको छ । अब दुवै प्रदेशले औपचारिक प्रक्रिया सुरु गरेर त्यसलाई टुङ्गो लगाइने बताइएको छ । भगिनी सम्बन्ध स्थापना भएपछि एक अर्का प्रदेशलाई आर्थिक, सामाजिक, सांस्कृतिक सम्बन्धलगायतमा सहयोग पुग्ने विश्वास लिइएको छ ।

मधेस प्रदेश तथा त्यसका विभिन्न पालिकासँग भगिनी सम्बन्ध बनाउने प्रयास यसअघि पनि नएको होइन तर विभिन्न अवरोधका कारण सम्भव भइरहेको थिएन । जनमत पार्टी नेपालका अध्यक्ष सीके राउत त्यसका लागि आफैँ अघि बढेका छन् ।

२०७६ मा महोत्तरीको गौशाला नगरपालिकाले चीनको सान्सी प्रान्तको सिन्चउ नगरसँग भगिनी सम्बन्ध स्थापना गर्ने र ६० करोड अमेरिकी डलर लगानी भित्र्याउने योजना अघि सारेको थियो । तर तत्कालीन मधेस प्रदेश सरकारले सहयोग गरेन । संघीय सरकारले पनि पर्याप्त सहयोग नगर्दा उक्त योजना सफल हुन सकेको थिएन ।

त्यस यता यस्तो प्रयास भएको थिएन । जनमत पार्टीका अध्यक्ष राउतले मधेस प्रदेशसँग भगिनी सम्बन्ध बनाउन युनान प्रान्तसँग कुराकानी अगाडि बढाएका हुन् ।

नेपालका विभिन्न प्रदेश तथा पालिकाले चीनका प्रान्त तथा नगरसँग भागिनी सम्बन्ध स्थापना गरेका छन् । बागमती प्रदेशले गान्सु प्रान्त, लुम्बिनी प्रदेशले सिचुवान प्रान्तसँग भगिनी सम्बन्ध स्थापना गरिसकेको छ ।

काठमाडौँ महानगरपालिकाले चीनको सेन्जेन, ल्हासा, सियान, लान्जाओ, छेन्दु सहरसँग भगिनी सम्बन्ध गाँसेको छ भने पोखरा महानगरपालिकाले चीनको कुनमिङ्ग, गोन्जाओ, यिविन, लिन्जी, छुसाओ, हाइकाओ नानिङ्ग सहरसँग सम्बन्ध स्थापित गरेको छ ।

त्यस्तै, बुटवल उपमहानगरपालिकाले सिमान, ललितपुर महानगरपालिकाले गोन्जाओ, भक्तपुरले छेन्दु र बनेपा नगरपालिकाले सिगात्से सहरलगायत नेपालका विभिन्न २७ स्थानीय तहले विभिन्न देशका नगरसँग भगिनी सम्बन्ध स्थापना गरेका छन् ।

मधेस प्रदेश