झलनाथको आरोप : पराजय भोग्नुको मुख्य कारण दक्षिणपन्थी कार्यदिशा, नीति र कार्यक्रम

काठमाडौँ । नेपाल कम्युनिस्ट पार्टी (नेकपा) का नेता झलनाथ खनालले गत निर्वाचनमा पार्टीले पराजय भोग्नुको मुख्य कारण नेतृत्वले अख्तियार गरेको गरेको दक्षिणपन्थी कार्यदिशा, नीति र कार्यक्रम भएको बताएका छन् । संयोजक पुष्पकमल दाहाल प्रचण्डलाई २४ पेजमा ३६ बुँदे असहमति पत्र लेख्दै नेता खनालले नेतृत्वमाथि यस्तो आरोप लगाएका हुन् ।

‘कुनै पनि देशको क्रान्ति वा निर्माणको ऐतिहासिक प्रक्रियामा त्यो क्रान्ति वा निर्माणलाई हाँकिरहेको कम्युनिस्ट पार्टीले सही वैचारिक–राजनीतिक कार्यदिशा लिइरहेको छ कि छैन, त्यस कुराले नै क्रान्ति वा निर्माणको विजय वा पराजयको सुनिश्चितता गर्छ’, खनालले प्रचण्डलाई प्रश्न गर्दै भनेका छन्, ‘तर कमरेड प्रचण्ड ! तपाईँको नेतृत्वको ‘कार्यदिशा’ ले पार्टीलाई कता लान खोजिरहेको छ ? सबैले गम्भीर हुनुपर्ने बेला आएको छ ।’