‘सहकारीको बचत फिर्ता गर्न राज्यको ढुकुटी चलाइएको छैन,असारदेखि लालपुर्जा बाँड्छौँ’

काठमाडौँ । भूमि व्यवस्था, सहकारी, सङ्घीय मामिला तथा सामान्य प्रशासन मन्त्री प्रतिभा रावलले आगामी असार तेस्रो सातादेखि सुकुमबासीहरूलाई लालपुर्जा वितरण कार्य सुरु गरिने बताएकी छन्। बुधबार प्रतिनिधिसभा बैठकमा मन्त्रालयगत बजेटमाथि सांसदहरूले उठाएका प्रश्नको जवाफ दिँदै उनले राज्य कोषबाट सहकारी पीडितको रकम फिर्ता नगरिएको समेत प्रस्ट पारेकी हुन्।

सुकुमबासी समस्या समाधानका लागि सरकारले नयाँ कार्ययोजनाका साथ काम गरिरहेको मन्त्री रावलले जानकारी दिइन्। विगतका आयोगहरू राजनीतिक भर्ती केन्द्र मात्र बनेकाले सुकुमबासी समस्या समाधान हुन नसकेको उनको टिप्पणी थियो। विगत ३० वर्षमा १२ लाख निवेदन प्राप्त भए पनि हालसम्म ९ हजारले मात्र लालपुर्जा पाउनु लज्जास्पद रहेको बताउँदै उनले अब सरकारले संरचनात्मक परिवर्तन गरेको उल्लेख गरिन्।