एल–निनोको प्रभावले मनसुन आगमनमा ढिलाइ: देशभर कम वर्षा र तापक्रम बढ्ने प्रक्षेपण

काठमाडौँ । नेपालमा मनसुन भित्रिने सामान्य निर्धारित मिति (जुन १३) कटिसक्दा पनि यस वर्ष अझै मनसुनी प्रणाली भित्रिन सकेको छैन। प्रशान्त महासागरमा विकसित मौसमी प्रणाली र पश्चिमी वायुको प्रभावका कारण मनसुन आगमनमा चार दिन ढिलाइ भइसकेको छ। जल तथा मौसम विज्ञान विभागले गरेको भू–उपग्रह तथा गणितीय मौसम पूर्वानुमानको विश्लेषणका आधारमा मनसुन आगमन अझै केही दिन धकेलिने देखिएको छ।

विभागकी प्रवक्ता विभूति पोखरेलका अनुसार हाल प्रशान्त महासागरमा 'एल–निनो' विकसित भइसकेको र अझै बलियो हुने क्रममा रहेकाले नेपालसहित दक्षिण एसियाकै मनसुन कमजोर हुन सक्ने सम्भावना छ। विगतका वर्षहरूमा पनि एल–निनोको प्रभाव रहँदा मनसुन आगमन ढिलो हुने गरेको तथ्याङ्क छ।