मैदान बाहिर आर्थिक साम्राज्य खडा गरेका मेसी

फुटबलको मैदानमा जादुमयी ड्रिबलिङ र सटिक फ्रि–किकले संसारलाई मन्त्रमुग्ध पार्ने लियोनेल मेसीले अब आर्थिक साम्राज्यमा पनि अर्को ऐतिहासिक ‘गोल’ गरेका छन् । मैदानभित्र मात्र होइन, मैदानबाहिर पनि आफ्नो व्यावसायिक कुशलता देखाउँदै आठ पटकका ब्यालोन डी ओर विजेता मेसी आधिकारिक रूपमा अर्बपति क्लबमा सामेल भएका छन् । ब्लूमबर्ग बिलियनेर्स इन्डेक्सको पछिल्लो प्रतिवेदन अनुसार, फुटबलका यी जादुगरको कुल सम्पत्ति १ अर्ब डलर (१ बिलियन डलर) पार भएको छ । यस अभूतपूर्व सफलतासँगै उनी क्रिस्टियानो रोनाल्डो र डेभिड बेकहमपछि फुटबल इतिहासमै आफ्नै मिहिनेत र खेलको बलमा अर्बपति बन्ने तेस्रो खेलाडी बनेका छन् । जसले उनको खेल कौशल जत्तिकै व्यावसायिक दूरदर्शितालाई पनि प्रमाणित गर्छ ।

धेरैलाई लाग्न सक्छ, अर्बपति बन्न उनले कुनै ठुलो आर्थिक प्रलोभन हात पारेको होला भनेर । तर, यथार्थ बेग्लै छ । सन् २०२३ मा साउदी अरेबियाको क्लबले अघि सारेको अर्बौँको विशाल प्रस्तावलाई सहजै अस्वीकार गर्दै अमेरिकी क्लब इन्टर मायमी जाने उनको निर्णय खेल इतिहासकै सबैभन्दा ठुलो ‘मास्टरस्ट्रोक’ सावित भएको छ । साउदीको त्यो भारी रकमको अफरबिना नै मेसीले कसरी यो उचाइ छोए त ? रहस्य उनले गरेको नवीन र स्मार्ट सम्झौतामा लुकेको छ ।