घोराही उपमहानगरको नीति तथा कार्यक्रम सार्वजनिक : बाँझो जमिन उपयोग गर्न भूमि बैंक र साप्ताहिक हाटबजार सञ्चालन गरिने

दाङ। दाङको घोराही उपमहानगरपालिकाले आगामी आर्थिक वर्ष २०८३/०८४ का लागि आफ्नो नीति तथा कार्यक्रम सार्वजनिक गरेको छ। उपमहानगरपालिकाले कृषि, शिक्षा, स्वास्थ्य, पूर्वाधार, रोजगारी तथा सामाजिक विकासलाई मुख्य प्राथमिकतामा राख्दै नयाँ नीति तय गरेको हो।

उपमहानगरपालिकाको १९औँ नगर अधिवेशनमा नीति तथा कार्यक्रम प्रस्तुत गर्दै नगर प्रमुख नरुलाल चौधरीले स्थानीय गौरवका आयोजना, अधुरा तथा क्रमागत योजनाहरूलाई प्राथमिकताका साथ समयमै कार्यान्वयन गरिने प्रतिबद्धता जनाए। उनले पुँजीगत बजेटको प्रभावकारी कार्यान्वयन सुनिश्चित गर्नका लागि आवधिक योजना, मध्यकालीन खर्च संरचना तथा आयोजना बैंकलाई मुख्य आधार बनाइने जानकारी दिए।