विकाश हाइड्रोपावरको नाफामा उछाल, खुद नाफा ७ करोड रुपैयाँ नाघ्यो

काठमाडौँ । विकाश हाइड्रोपावर कम्पनीले चालु आर्थिक वर्ष २०८२/८३ को तेस्रो त्रैमासिकमा आफ्नो खुद नाफामा ६२२ प्रतिशतको विशाल वृद्धि हासिल गरेको छ । कम्पनीले सार्वजनिक गरेको अपरिष्कृत वित्तीय विवरणअनुसार खुद नाफा ७ करोड १० लाख रुपैयाँ पुगेको हो, जुन गत वर्षको सोही अवधिमा ९८ लाख ४५ हजार रुपैयाँ थियो ।

कम्पनीको नाफामा आएको यो उल्लेखनीय सुधारको पछाडि विद्युत् बिक्रीबाट हुने आम्दानीमा भएको वृद्धि र ब्याज खर्चमा गरिएको कटौती प्रमुख कारण रहेका छन् । समीक्षा अवधिमा कम्पनीको विद्युत् बिक्री आय ५१.०५ प्रतिशतले बढेर १३ करोड ८१ लाख रुपैयाँ पुगेको छ । त्यसैगरी, कम्पनीले वित्तीय व्यवस्थापनलाई प्रभावकारी बनाउँदै आफ्नो ब्याज खर्च ५४.११ प्रतिशतले घटाएर १ करोड ७६ लाखमा झार्न सफल भएको छ ।