मत्स्यपालनका समस्या समाधानका लागि पहल गर्छु: कृषि मन्त्री परियार

काठमाडौँ । कृषि तथा पशुपन्छी विकासमन्त्री डा मदन परियारले मत्स्यपालनसम्बन्धीका समस्या मन्त्रालयसमक्ष पेस गर्न आग्रह गरेका छन् ।

आइतबार माछापोखरीस्थित ‘केन्द्रीय मत्स्यपालन प्रवर्द्धन तथा संरक्षण केन्द्र’ अवलोकनपछि आयोजित छलफलमा उनले माछाको दाना, गुणस्तरीय नश्ल वा जातका भुरा माछाको विकास तथा सुधार, व्यवस्थित ढुवानी, गुणस्तरीय बरफ उत्पादन, कच्चापदार्थ स्वदेशमै उत्पादन, विद्युत् आपूर्तिलगायत सुधार गर्नुपर्ने विषयमा अध्ययन गरेर सुझाव दिन अनुरोध गरेका हुन्। उनले सुझावको आधारमा समग्र मत्स्यपालनको क्षेत्रमा देखिएका समस्या समाधानका लागि पहल गर्ने प्रतिबद्धता व्यक्त गरे ।