छ हजार ६३० विद्यार्थी राष्ट्रिय सेवा दल तालिममा

युवा पुस्तामा अनुशासन, नेतृत्व क्षमता, सामाजिक उत्तरदायित्व तथा राष्ट्रसेवाको भावना विकास गर्ने उद्देश्यले राष्ट्रिय सेवा दलले जुनियर डिभिजन राष्ट्रिय सेवा दल (एनसीसी) तालिम सुरु गरेको छ । देशभरका २२१ विद्यालयमा अध्ययनरत छ हजार ६३० छात्रछात्रालाई समेटेर यो तालिम सुरु गरिएको हो ।

विद्यालय तहदेखि नै सक्षम, अनुशासित र राष्ट्रप्रति समर्पित नागरिक तयार पार्ने लक्ष्यका साथ सञ्चालन गरिएको उक्त तालिम दुई चरणमा सम्पन्न गरिँदै छ । सैनिक जनसम्पर्क तथा सूचना निर्देशनालयका अनुसार पहिलो चरणमा सम्बन्धित विद्यालयमै संस्थागत तालिम सञ्चालन गरिनेछ । दोस्रो चरणमा सहभागी विद्यार्थीलाई समावेश गरी वार्षिक सामूहिक क्याम्प आयोजना गरिनेछ । आगामी भदौ महिनादेखि ३६ वटा विद्यालयका एक हजार ८० विद्यार्थीलाई समेटेर सिनियर डिभिजन तालिमसमेत सञ्चालन गर्ने तयारी छ ।