पोषणको स्रोत फर्सी

फर्सी मिठो र स्वादिलो तरकारी हो । यो जहाँ पनि सजिलै उपलब्ध हुन्छ । फर्सी आफैंमा पोषक तत्वले भरिपूर्ण हुन्छ । फर्सीको फल मात्र नभएर यसको बियाँ र मुन्टाबाट पनि पोषक तत्व पाइन्छ । बच्चादेखि बृद्धसम्म सबैले रुचाउँछन् यसको तरकारी । फर्सीमा प्रशस्त मात्रमा खनिज र भिटामिन पाइन्छ ।

यी तत्वले शरीरलाई स्वस्थ र तन्दुरुस्त राख्न मद्दत गर्छन् । फर्सीमा प्रशस्त मात्रामा ‘बिटा क्यारोटिन’ पाइन्छ । यो खानापछि शरीरभित्र ‘भिटामिन ए’मा परिणत भई स्वस्थ आँखा र स्वस्थ मुटुका लागि भरपुर सहयोग गर्छ । बिटा क्यारोटिनले क्यान्सर हुनबाट जोगाउँछ । फर्सीमा प्रशस्त मात्रामा पाइने पोटासियमले हाम्रो शरीरमा रक्तचापको सन्तुलन मिलाउँछ ।