बजेट अभावले खुम्चिँदै मनमोहन प्राविधिक विश्वविद्यालयको शैक्षिक लक्ष्य

विराटनगर । कोशी प्रदेश सरकारद्वारा स्थापित मनमोहन प्राविधिक विश्वविद्यालय बजेट अभावका कारण सङ्कटमा परेको छ। मोरङको बुढीगंगा–४ हात्तीमुढामा ३० अर्बभन्दा बढीको आधुनिक पूर्वाधार रहे पनि प्रदेश सरकारले पर्याप्त बजेट विनियोजन नगर्दा विश्वविद्यालयको शैक्षिक प्रगतिमा बाधा पुगेको हो।

स्थापनाको छोटो समयमै गुणस्तरीय प्राविधिक शिक्षामा पहिचान बनाएको यस विश्वविद्यालयले बजेटकै कारण आफ्ना महत्त्वाकाङ्क्षी योजना अगाडि बढाउन सकेको छैन। १० वर्षभित्र दक्षिण एसियामै उत्कृष्ट प्राविधिक केन्द्र बन्ने रणनीति लिएको विश्वविद्यालयलाई हालको सीमित बजेटले लक्ष्य भेट्न कठिन भएको उपकुलपति डा. सुवासश्री पोखरेलले बताए।