सहकारीका बचतकर्ताको रकम फिर्ता गर्न राज्यकोषको एक पैसा पनि खर्च गरिएको छैन: मन्त्री रावल

काठमाडौँ । भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले समस्याग्रस्त सहकारी संस्थाका बचतकर्ताहरूको बचत फिर्ताका लागि हालसम्म नेपाल सरकारको राज्यकोषबाट एक पैसा पनि खर्च नगरिएको बताएकी छन्। आज प्रतिनिधिसभाको बैठकमा बोल्दै मन्त्री रावलले यस प्रयोजनका लागि राज्यकोषबाट रकम खर्च भइरहेको छ भन्ने भ्रममा नपर्न र संसद्लाई त्यस्तो भ्रमबाट मुक्त हुन आह्वान गरिन्।

सम्बोधनका क्रममा उनले समस्याग्रस्त सहकारीको बचत फिर्ता, ऋण असुली, पोषण कार्यक्रम र सङ्घीय निजामती सेवा विधेयकको प्रगतिबारे मन्त्रालयको स्पष्ट धारणा राखिन्।