चितवनको तुइन खोलामा सुख्खा पहिरो खस्दा सडक एकतर्फी बन्यो

चितवन । मुग्लिन–नारायणगढ सडक खण्डअन्तर्गत तुइन खोला पुल नजिक बुधबार राति सुख्खा पहिरो खस्दा सडक एकतर्फी अवरुद्ध भएको छ।

सडक डिभिजन भरतपुरका अनुसार राति ९ बजे सडकमाथिबाट सुख्खा पहिरो खसेपछि उक्त सडक खण्डमा सवारी आवागमन प्रभावित भएको हो। पहिरो झर्ने क्रम जारी रहेकाले सडक पूर्ण रूपमा सञ्चालनमा आउन सकेको छैन।

पहिरो पन्छाउन सम्बन्धित स्थानमा मेसिन परिचालन गरिसकिएको र अवरोध हटाउने कार्य जारी रहेको सडक डिभिजनले जनाएको छ।

डिभिजनले पहिरोका कारण यात्रामा समस्या हुन सक्ने भएकाले यात्रु तथा सवारी चालकलाई प्रहरीको निर्देशन पालना गर्न र सडकको पछिल्लो अवस्था बुझेर मात्र सुरक्षित यात्रा गर्न अनुरोध गरेको छ ।