नेपालका निषेधित क्षेत्र र पर्यटन गतिविधि

नेपाल सरकारले हालसम्म नेपालका पाँचवटा हिमाली जिल्लाका केही क्षेत्रलाई निषेधित भनी घोषणा गरेको छ भने ती क्षेत्रमा पदयात्रा गर्न जाने विदेशी पर्यटकहरुका लागि निश्चित समयावधि, निश्चित रकम अर्थात् सलामी दस्तुरका साथै अन्य केही सर्तहरु तोकेर अनुमतिपत्र अर्थात् र ट्रेकिङ पर्मिट जारी गर्ने गरेको छ । नेपाल सरकारले निषेधित क्षेत्र भनी घोषणा गरेका क्षेत्रहरुमा मुस्ताङ जिल्लाको माथिल्लो भाग, डोल्पा जिल्लाको माथिल्लो भाग, गोरखा जिल्लाको मनास्लु क्षेत्रका चुम र नुबी भ्याली, हुम्ला जिल्लाको सिमकोट, चंखेली र नाम्खा गापाका केही ठाउँहरु र ताप्लेजुङ जिल्लाको कञ्चनजंघा क्षेत्र रहेका छन् ।

मुस्ताङ जिल्लाको माथिल्लो भागमा भ्रमण गर्न चाहने विदेशी पर्यटकले १० दिनका लागि प्रतिव्यक्ति एकमुष्ट पाँच सय अमेरिकी डलर सलामी दस्तुर तिर्नुपर्छ भने केही गरी पाँच दिनभन्दा बढी बस्नु, रहनुपरेमा प्रतिदिन प्रतिव्यक्ति ५० अमेरिकी डलर थप रकम तिर्नुपर्छ । त्यस्तै माथिल्लो डोल्पा जिल्लाको माथिल्लो भागमा भ्रमण गर्न चाहने विदेशी पर्यटकले पनि १० दिनका लागि प्रतिव्यक्ति एकमुष्ट पाँच सय अमेरिकी डलर सलामी दस्तुर तिर्नुपर्छ भने केही गरी पाँच दिनभन्दा बढी बस्नु, रहनुपरेमा प्रतिदिन प्रतिव्यक्ति ५० अमेरिकी डलर थप रकम तिर्नुपर्छ ।