एमाले सांसदले 'कान सुन्नुहुन्न' भन्दै सभामुखको अपमान गरेको ठहर, संसद् अभिलेखबाट हटाइयो रेकर्ड

काठमाडौँ । सङ्घीय संसद् प्रतिनिधि सभाको बैठकमा सभामुखको अपमान हुने गरी अभिव्यक्ति दिएको भन्दै प्रमुख प्रतिपक्षी दल नेकपा (एमाले) का सांसद राजेन्द्रकुमार राईले बोलेका शब्दहरू संसद्को अभिलेख (रेकर्ड) बाट हटाइएको छ । बुधबार प्रतिनिधि सभाको बैठक सुरु भएसँगै प्रतिपक्षतर्फका सांसदहरू आ-आफ्नो स्थानमा उभिएका थिए ।

सभामुख डोलप्रसाद अर्याल (डीपी) ले सुरुमा सांसद प्रमिलाकुमारी गच्छदारलाई छोटकरीमा आफ्नो भनाइ राख्न समय दिएका थिए । गच्छदारले भारतसँगको सीमा समस्या र प्रधानमन्त्रीको हलुका अभिव्यक्तिका कारण सुस्ता लगायतका क्षेत्रका जनता त्रसित र दबाबमा रहेको दाबीसहितका विषयहरू उठाएकी थिइन् ।