कैलाली-दिपायल दुरी ९३ किलोमिटर छोट्टिँदै, बझाङ यात्रा आधा कम हुने

कैलालीदेखि डोटीको दिपायलसम्मको दुरीलाई ‘खुटिया–दिपायल–चैनपुर–उरैभन्ज्याङ’ सडक आयोजनाले आधाभन्दा कम दुरीमा सीमित गर्दै छ। कैलालीदेखि दिपायलसम्मको करिब १९२ किलोमिटर दुरीलाई ‘खुटिया–दिपायल–चैनपुर–उरैभन्ज्याङ’ सडक आयोजनाले ९३ किलोमिटरमा छोट्याउन लागेको हो।

करिब १० वर्षअघि सुदूरपश्चिमको तराई जिल्ला कैलालीलाई उच्च पहाडी तथा हिमाली जिल्ला बझाङसम्म पुग्ने गरी छोटो दुरीको मार्ग बनाउने आयोजना सुरु गरिएको थियो। आर्थिक वर्ष २०७३/७४ सालमा कैलालीको हसनपुरदेखि डोटीको सदरमुकाम दिपायल हुँदै बझाङको चैनपुरसम्म पुग्ने सबैभन्दा छोटो दुरीको सडक बनाउने काम अगाडि बढाइएको हो। विशेष गरी सुदूरपश्चिमको सबैभन्दा उच्च पहाडी तथा हिमाली जिल्ला बझाङको सदरमुकाम पुग्न कैलालीबाट डडेलधुरा, बैतडी हुँदै २५० किलोमिटरको दुरी पार गर्नुपर्छ। यही दुरीलाई ‘खुटिया–दिपायल–चैनपुर–उरैभन्ज्याङ’ सडक आयोजनाले १८६ किलोमिटरमा घटाउँछ।