वर्षौँसम्म सडक नबनेपछि आक्रोश: झापाका स्थानीयले हिलाम्मे सडकमै रोपे धान

काठमाडौँ । सुरुङ्गादेखि झापा गाउँपालिकाको सिमलबारी, कुवाडी हुँदै झापा बजार जोड्ने लक्ष्मीमार्ग वर्षौंदेखि अलपत्र परेपछि स्थानीय बासिन्दाले अनोठो र आक्रोशपूर्ण विरोध जनाएका छन्। वर्षायाम सुरु भएसँगै हिँडिनसक्नु गरी हिलाम्मे बनेको सडकमै उनीहरूले धान रोपेर सरकार र सम्बन्धित निकायको ध्यान खिच्ने प्रयास गरेका हुन्।

पूर्वी झापाको महत्वपूर्ण आवागमन मार्गका रूपमा रहेको यो सडक निर्माणका लागि स्थानीयले वर्षौंदेखि माग गर्दै आएका थिए। तर, सम्बन्धित निकायले लगातार बेवास्ता गरेपछि बाध्य भएर सडकलाई नै हिलो खेतको रूपमा परिणत गरी धान रोपाइँ गरिएको स्थानीयले बताएका छन्। यो साङ्केतिक विरोधमार्फत उनीहरूले सडकको दयनीय अवस्थाप्रति सरोकारवालाहरूको कडा आलोचना गरेका छन्।