विश्वविद्यालय, शैक्षिक बहाव र भविष्य

देश विकास र समृद्धिको आधार सम्बन्धित मुलुकको शिक्षाको अवस्थाले निर्धारण गर्छ । हरेक क्षेत्रमा आवश्यक दक्ष जनशक्ति उत्पादन हुन नसकेसम्म मुलुकले विकासको गति लिन सक्दैन । मुलुकमा अब्बल मानवस्रोत वैज्ञानिक, डाक्टर, इन्जिनियर, शिक्षक, प्राध्यापक, वकिल, शासक, प्रशासक, अनुसन्धानकर्तालगायतका जनशक्ति उत्पादन गर्ने काम विश्वविद्यालयहरूको हो । आजका विश्वजगतका विकसित मुलुकहरूले सक्षम जनशक्ति उत्पादन गरेर उनीहरूको दक्षतालाई विकास निर्माणमा लगाएकाले विकसित भएका हुन् । हाम्रो मुलुकको सन्दर्भमा राज्यले विकासको पहिलो आधार शिक्षालाई बनाउन सकेन । दलहरूले राजनीतिक दर्शन र प्रयोगलाई देश विकासको आधार मानेकाले मुलुकले विकासको गति लिन सकेन ।

सन् २०२४ का उत्कृष्ट १० विश्वविद्यालयहरू क्रमशः म्यास्याचुसेट्स प्राविधिक युनिभर्सिटी अमेरिका, क्याब्रिज युनिभर्सिटी बेलायत, अक्सफोर्ड युनिभर्सिटी बेलायत, हार्वर्ड युनिभर्सिटी अमेरिका, स्टयान्फोर्ड विश्वविद्यालय बेलायत, इम्पेरियल कलेज लन्डन, स्वीस फेडेरल प्राविधिक विश्वविद्यालय स्वीट्जरल्यान्ड, नेसनल युनिभर्सिटी सिंगापुर, यूसीएल विश्वविद्यालय बेलायत र क्यालिफोर्निया युनिभर्सिटी अमेरिका रहेका छन् । उल्लिखित विश्वविद्यालयहरू भएका मुलुकहरूले विकासमा चमत्कार गरेका छन् । यसैगरी, अन्य युरोपलगायतका राष्ट्रहरूमा अब्बल दर्जाका विश्वविद्यालयहरू छन् । यसरी हेर्दा जुन मुलुकका राजनीतिज्ञहरूले वैज्ञानिक, व्यावहारिक तथा जीवन उपयोगी शिक्षालाई विकासको आधार बनाए, ती मुलुक हरेक क्षेत्रमा उन्नति गर्न सफल भए ।