सरुवा प्रणालीमा मौलाउँदै गएको विकृति

संघीय शासन प्रणालीको प्रभावकारी कार्यान्वयनका लागि स्थानीय तहलाई सक्षम, जिम्मेवार र स्थायी प्रशासनिक नेतृत्व आवश्यक पर्छ । तर विडम्बना, संघीय मामिला तथा सामान्य प्रशासन मन्त्रालय स्वयंले स्थानीय तहमा ‘निमित्त प्रमुख प्रशासकीय अधिकृत’ हटाउने प्रतिबद्धता जनाए पनि व्यवहारमा त्यसको उल्टो प्रवृत्ति मौलाउँदै गएको देखिएको छ । पछिल्ला सरुवा निर्णयहरूले सरकारको नीति र व्यवहारबीचको गहिरो अन्तर मात्र उजागर गरेको छैन, सुशासनप्रतिको सरकारी प्रतिबद्धतामाथि नै गम्भीर प्रश्न खडा गरेको छ ।

सरकार गठनसँगै संघीय मामिला तथा सामान्य प्रशासनमन्त्री प्रतिभा रावलले स्थानीय तहमा निमित्त प्रथा अन्त्य गर्ने उद्घोष गर्नुभएको थियो । मन्त्रालयका सचिव चन्द्रकला पौडेलले पनि यसलाई प्राथमिकता दिने संकेत गर्नुभएको थियो । तर पछिल्ला सरुवा निर्णयले ती प्रतिबद्धता केवल भाषण र प्रचारमा सीमित भएको पुष्टि गरेको छ । देशभरका दर्जनौँ स्थानीय तह अहिले पनि निमित्तकै भरमा चलिरहेका छन् । शुक्रबार गरिएको ६१ कर्मचारीको सरुवामा समेत निमित्त रहेका स्थानीय तहमा उपसचिव नपठाइनुले मन्त्रालयको नियतमाथि प्रश्न उठ्नु स्वाभाविक हो ।