सुर्खेत विमानस्थल विस्तारको ‘खिचडी योजना’ले मनोवैज्ञानिक त्रासमा प्रभावित क्षेत्रका नागरिक

संघीय सरकारले हरेक वर्षको १५ जेठमा ल्याउने वार्षिक बजेट वक्तव्यपछि चर्चामा आइरहन्छ सुर्खेत विमानस्थल । उसो त संघीयतापछि कुनै न कुनै कारणले चर्चामै छ यो विमानस्थल । कर्णाली प्रदेशको हवाई यातायातको ढोका रहेको यो विमानस्थल कहिले विस्तारको योजनाले चर्चामा आउँछ त कहिले शक्तिमा रहेका नेताहरूले विमानस्थलमा आउने बजेटमा अपनत्व लिन गरिने होडबाजीले ।

२०७७ यता निरन्तर संघीय सरकारका नीति, कार्यक्रम तथा बजेटमा विमानस्थलको धावनमार्ग विस्तार गर्ने योजना समेटिन्छ । बजेट पनि विनियोजन हुन्छ । सरकारको नीति अनुसार हालको धावनमार्गलाई विस्तार गरेर ठूला प्रकृतिका जहाजले सहज उडान भर्न सक्ने बनाउनु छ ।