प्रेरक प्रसंग : दृष्टिकोणको अन्तर

विपन्न परिवारका राम र श्याम नामका दुवै दाजुभाइ नौ कक्षामा पढ्थे । उनीहरूकै कक्षामा मनोज नामका निकै सम्पन्न परिवारका एक छात्र पनि पढ्थे । एक दिन मनोजले आफ्नो जन्मदिनमा एउटा महँगो घडी लगाएर स्कुल आए । सबै छात्रछात्रा त्यो घडी देख्दा छक्क परे । सबैले त्यो घडीको प्रशंसा गरे । एक छात्रले मनोजलाई सोधे– तिमीलाई यो घडी कसले दियो ? मनोजले उत्तर दिए– मेरा दाइले मेरो जन्मदिनमा उपहार दिनुभएको हो ।

मनोजको जवाफ सुनेपछि सबैले उनका दाजुको प्रशंसा गरे । साथै, कसैले चाहिँ आफ्ना पनि यस्तै दाजु भइदिएको भए कति जाति हुन्थ्यो भन्ने कल्पना गरे । श्यामले दाजु रामसित भने– हाम्रो पनि यस्तै दाजु भइदिएको भए हुन्थ्यो नि हगि दाइ ? राम मुसुक्क मुस्कुरायो मात्र, कुनै प्रतिक्रिया जनाएन । तर, उसले मनमनै भन्यो– हो, म पनि यस्तै दाजु बन्न पाएको भए कति जाति हुँदो हो ?