इन्जुरी समयको गोलसँगै घानाको सनसनीपूर्ण जित, पानामा १–० ले पराजित

काठमाडौँ । फिफा विश्वकप २०२६ अन्तर्गत समूह ‘एल’ को खेलमा घानाले इन्जुरी समयको अन्तिम क्षणमा गोल गर्दै पानामामाथि १–० को रोमाञ्चक जित निकालेको छ।

क्यानडाको टोरन्टो स्टेडियममा सम्पन्न खेलमा निर्धारित ९० मिनेटसम्म दुवै टोली गोलरहित बराबरीमा थिए। खेल अतिरिक्त समयतर्फ लम्बिएको अवस्थामा घानाका क्लेभिन यिरेन्की नायक बने।

खेलको ९० प्लस ५औँ मिनेटमा ब्रान्डन थोमस–असान्टेको पासमा यिरेन्कीले निर्णायक गोल गर्दै घानालाई महत्वपूर्ण तीन अंक दिलाए।

यसअघि अतिरिक्त समय सुरु हुनुअघि घानाले गोल गर्ने उत्कृष्ट अवसर खेर फालेको थियो। एन्टोइन सेमेन्योको पासमा गोलकिपरसँग एक्लिएका थोमस–असान्टेको प्रहार पानामाका गोलरक्षक ओर्लान्डो मोस्केराले बचाएका थिए। त्यसपछि अफसाइडको संकेत गरिएको थियो।

खेलभर घानाले पानामाभन्दा बढी आक्रामक प्रदर्शन गरेको थियो। पहिलो हाफ गोलरहित बराबरीमा सकिए पनि दोस्रो हाफमा लगातार दबाब बनाएको घानाले अन्ततः इन्जुरी समयमा सफलता पाएको हो।

यो जितसँगै घानाले समूह ‘एल’ मा महत्वपूर्ण सुरुआती तीन अंक जोडेको छ भने पानामा अन्तिम क्षणको गोलका कारण निराश बनेको छ।