जटिल आर्थिक अवस्थाबीचका सम्भावनाहरू

आर्थिक वर्ष २०८२/८३ मा नेपालको अर्थतन्त्र ‘बाहिर बलियो, भित्र कमजोर’ खालको दोहोरो चरित्रमा रहेको देखिन्छ। रेमिट्यान्स र विदेशी मुद्रा सञ्चितिले बाह्य क्षेत्रलाई इतिहासकै सबल बनाए तापनि उत्पादन, लगानी र रोजगारीको आन्तरिक जग भने बलियो छैन। आर्थिक वृद्धिदर सुस्ताएको वर्तमान अवस्थालाई पूर्वाधार विकास र आयात प्रतिस्थापनमा जोड दिई आत्मनिर्भर अर्थतन्त्रको जग बसाल्ने अवसरमा परिणत गर्न सकेमा भविष्यका निमित्त सबल अर्थतन्त्र निर्माण गर्न सकिन्छ।

गत वर्ष ४.६ प्रतिशत वृद्धि भएको जीडीपी चालु आर्थिक वर्षमा २.७ प्रतिशतदेखि ३.८५ प्रतिशतको बीचमा रहने अनुमान छ। एसियन डेभलपमेन्ट बैंकले यसको वृद्धिदर २.७ प्रतिशत रहने उल्लेख गरे पनि नेपाल सरकारको आर्थिक सर्वेक्षणले यसलाई ३.८५ प्रतिशतको लक्ष्यमा राखेको छ।