भारतीय नम्बर प्लेटका दुई बेवारिसे कार बरामद, भन्सार कार्यालय बुझाइयो

रूपन्देही । रूपन्देहीको सिद्धार्थनगर नगरपालिका–६ शहीदपथ क्षेत्रबाट प्रहरीले बेवारिसे अवस्थामा रहेका दुई वटा भारतीय नम्बर प्लेटका कार बरामद गरेको छ ।

जिल्ला प्रहरी कार्यालय रूपन्देही र इलाका प्रहरी कार्यालय बेलहियाबाट खटिएको संयुक्त प्रहरी टोलीले शंकास्पद अवस्थामा पार्किङ गरिएको अवस्थामा ती कार फेला पारी नियन्त्रणमा लिएको हो ।

बरामद गरिएका सवारीसाधनमा युपी ५३ बिडी ००२९ नम्बरको हुन्डाई कम्पनीको कार र युपी ५३ डिएफ ६९८० नम्बरको महिन्द्रा कम्पनीको कार रहेका छन् । दुवै सवारीसाधनको अनुमानित बजार मूल्य करिब २७ लाख रुपैयाँ रहेको प्रहरीले जनाएको छ।

रूपन्देही प्रहरीका प्रवक्ता प्रहरी नायब उपरीक्षक कृष्ण चन्दका अनुसार बरामद गरिएका दुवै कार आवश्यक कानुनी कारबाहीका लागि भैरहवा भन्सार कार्यालय, बेलहियामा बुझाइएको छ।

प्रहरीले सवारीसाधन बेवारिसे अवस्थामा त्यहाँ कसरी आइपुगे भन्ने विषयमा समेत अनुसन्धान अघि बढाएको जनाएको छ।