स्वयम्भूको सार्वजनिक जग्गादेखि डल्लुको देवस्थलसम्म व्यक्तिको कब्जामा

काठमाडौँ । काठमाडौँस्थित स्वयम्भूको सार्वजनिक जग्गादेखि डल्लुको देवस्थलसम्म व्यक्तिले अतिक्रमण गरेको पाइएको छ । तत्कालीन सरकारले २०४९ सालमा सरकारी तथा सार्वजनिक जग्गा संरक्षणका विषयमा पूर्वसचिव रामबहादुर रावलको संयोजकत्वमा गठन गरेको उच्चस्तरीय छानबिन आयोगले काठमाडौँ महानगरभित्र १ हजार ८५९ रोपनी १४ आना २ दाम ३ पैसा जग्गा अतिक्रमण भएको विवरणसहितको प्रतिवेदन बुझाएको थियो ।

रावल आयोगको तत्कालीन सरकारलाई दिएको प्रतिवेदनमा काठमाडौँको स्वयम्भू क्षेत्र र डल्लुको विभिन्न ठाउँमा व्यक्तिले आफ्नो निजी प्रयोजनका लागि सार्वजनिक जग्गा अतिक्रमण गर्नुका साथै आफ्नो जग्गामा घुसाएको पाइएको छ । डल्लुको देवस्थान चौरको कित्ता नं. १ को चौरमा कान्छी, भाइकाजी र सिद्धिमान महर्जनले ५ आना १ पैसा १ दाम जग्गामा तीन वटा पक्की घर बनाएको र अर्को ३ आना जग्गामा टहरा बनाएर भाडामा लगाएको प्रतिवेदनमा उल्लेख छ ।