आत्मनिर्भर बन्दै रौतहटका हजारभन्दा बढी मुस्लिम तथा दलित महिला

रौतहट । चन्द्रपुर नगरपालिका–७ बनबहुअरीकी दुखनी थरुनीलाई हिजोआज तरकारी बेच्न र टिप्न भ्याई नभ्याई छ । आफ्नै करिब पाँच कठ्ठा जमिनमा व्यावसायिकरूपमा लगाइएको तरकारी बालीले थरुनीलाई व्यस्त बनाएको हो । यसबाट उनलाई आर्थिकरूपमा पनि सबल बनाएको देखिन्छ ।

लौका, करेला, घिरौँलालगायतका तरकारी अहिले उनको बारीमा लटरम्म छ । आफूले दैनिक १ हजार ५ सयदेखि २ हजार रुपैयाँसम्मको तरकारी बेच्ने गरेको तरकारी कृषक थरुनीले सुनाइन् । उनले आफ्ना ग्राहकहरूलाई बारीबाट नै र बाँकी रहेको तरकारी स्थानीय हाट बजारमा लगेर बिक्री गर्ने गरेको सुनाइन् ।