अमेरिका–इरान समझदारीपछि कच्चा तेलको मूल्य घट्यो

काठमाडौँ । अन्तर्राष्ट्रिय बजारमा कच्चा तेलको मूल्य घटेको छ। अमेरिका र इरानबीच अस्थायी सहमतिको खबर सार्वजनिक भएसँगै आपूर्ति जोखिम घट्ने अपेक्षाले बजारमा दबाब बढ्दा मूल्य ओरालो लागेको हो।

ब्रेन्ट क्रुडको मूल्य करिब १.६६ प्रतिशतले घटेर प्रतिब्यारेल ७८ डलरको आसपास पुगेको छ भने डब्लूटीआई क्रुड पनि झन्डै १.९० प्रतिशतले घट्दै ७५ डलर नजिक कारोबार भइरहेको छ।

विश्लेषकहरूका अनुसार इरानबाट पुनः ठूलो परिमाणमा कच्चा तेल निर्यात हुन सक्ने सम्भावनाले बजारमा आपूर्ति बढ्ने संकेत देखिएको छ, जसले मूल्य घटाउन सहयोग गरेको हो।

हालको प्रारम्भिक समझदारीअनुसार अमेरिका र इरानबीच ६० दिनसम्म वार्ता जारी रहनेछ। यस अवधिमा विशेषगरी महत्वपूर्ण जलमार्ग स्ट्रेट अफ हर्मुज पुनः पूर्ण रूपमा सञ्चालनमा ल्याउने विषयमा केन्द्रित रहने जनाइएको छ।

साथै, इरानमाथिका प्रतिबन्धहरू आंशिक रूपमा खुकुलो हुन सक्ने अपेक्षाले पनि आपूर्ति थप बढ्ने आँकलन गरिएको छ। यदि सहमति कार्यान्वयनमा आएमा आगामी दिनमा बजारमा आपूर्तिको दबाब अझ बढ्न सक्ने विश्लेषकहरूको भनाइ छ।