महेन्द्र मोरङ क्याम्पसमा स्ववियु निर्वाचनलाई लिएर आगजनी प्रयास

विराटनगर — महेन्द्र मोरङ क्याम्पस विराटनगरमा स्ववियु निर्वाचनको विषयलाई लिएर नेपाल विद्यार्थी संघका दुई समूहबीच झडप भएको छ । कांग्रेस नेता शेखर कोइराला निकट केही विद्यार्थी नेताले निर्वाचन अधिकृत डा. सुशीलकुमार अधिकारीलाई निर्वाचन समितिको कार्यालयभित्र थुनेर आगजनी प्रयास गरेका छन् ।

बुधबार मध्याह्न कोइराला समूहका विद्यार्थी नेताले अधिकारीलाई कोठामा थुनेर बाहिरबाट तालाबन्दी गरी आगजनी प्रयास गरेका थिए । केहीबेरपछि प्रहरीको टोलीले ताला फोरेर अधिकारीको सकुशल उद्धार गरेको थियो । घटनामा संलग्न रहेको आरोपमा नेविसंघका केन्द्रीय सदस्य योगराज दाहाल, पूजा विश्वास, जिल्ला सचिव गुड्डु साह र आयुष दाहाललाई प्रहरीले पक्राउ गरेको छ । उनीहरूलाई मोरङ जिल्ला प्रहरी कार्यालयमा राखेर अनुसन्धान भइरहेको जनाइएको छ ।