संघीय सरकारले संघीयतालाई कमजोर बनाउन खोजेको सभामुख मण्डलको आरोप

मधेस प्रदेश सभाका सभामुख रामचन्द्र मण्डलले संघीय सरकारले संघीयतालाई सबल बनाउनुको साटो कमजोर पार्ने खेलमा लागेको आरोप लगाएका छन्।

महोत्तरीको मटिहानी नगरपालिकाको १७ औँ नगरसभालाई सम्बोधन गर्दै सभामुख मण्डलले संघीय सरकारको कार्यशैलीप्रति असन्तुष्टि व्यक्त गरे।

सभामुख मण्डलले संघीय सरकारले प्रदेश र स्थानीय तहलाई संवैधानिक अधिकार सम्पन्न सरकारको रूपमा स्वीकार गर्नुको साटो आफ्नो प्रशासनिक निकायको रूपमा मात्र प्रयोग गर्न खोजेको बताए।

मटिहानी नगरपालिकाको उदाहरण दिँदै सभामुख मण्डलले मानव विकास सूचकाङ्क (एचडीआई) मा पछि परेका क्षेत्रलाई प्राथमिकता दिनुको साटो न्युन अनुदान दिएर विभेद गरिएको उल्लेख गरे।

विपन्न र दलित समुदायको बाहुल्यता रहेको मटिहानीले समानीकरण अनुदानतर्फ मात्र १० करोड रुपैयाँ प्राप्त गर्नु अन्यायपूर्ण रहेको उनको तर्क थियो।

उनले भने, ‘संघीय सरकारले कुल बजेटको ७० प्रतिशत हिस्सा केन्द्रमै राखेर प्रदेश र स्थानीय तहलाई १५/१५ प्रतिशत मात्र बजेट बाँडफाँट गरेको छ। यो संघीयताको मर्म विपरीत छ।’

उनले संघीयतालाई मजबुत बनाउन संविधानले दिएको अधिकारहरूको निर्वाध प्रयोग गर्न पाउने वातावरण हुनुपर्नेमा जोड दिए।–न्युज एजेन्सी नेपाल