मस्कोको प्रमुख तेल रिफाइनरीमा युक्रेनको दोस्रो ठुलो ड्रोन आक्रमण

युक्रेनले बिहीबार बिहानै रुसको राजधानी मस्कोस्थित एक प्रमुख तेल रिफाइनरीमा एकै हप्तामा दोस्रो पटक भीषण ड्रोन आक्रमण गरेको छ। मस्कोको ऊर्जा पूर्वाधारलाई ध्वस्त पार्ने उद्देश्यले युक्रेनले पछिल्लो समय रुसी भूमिभित्रै लामा दूरीका हतियारहरू प्रयोग गरी आक्रमण तीव्र पारेको सीएनएनले जनाएको छ ।

मस्कोका मेयर सर्गेई सोब्यानिनका अनुसार दक्षिण-पूर्वी जिल्ला कापोत्न्यामा रहेको 'मस्को आयल रिफाइनरी'मा कैयौँ ड्रोनहरू ठोक्किएका छन्। सोब्यानिनले मस्कोतर्फ आउँदै गरेका ४८ भन्दा बढी ड्रोनहरूलाई रुसी वायु रक्षा प्रणालीले खसालेको दाबी गरेका छन्। उनले सामाजिक सञ्जाल टेलिग्राममार्फत वायु रक्षा बलले ठुलो आक्रमणलाई विफल पार्न जारी राखेको जानकारी दिएका छन्।

रुसी राज्य सञ्चालित सञ्चार माध्यम टासका अनुसार मस्को बाहिर झुकुभोस्कीमा रहेको एउटा आवासीय अपार्टमेन्ट भवनमा पनि ड्रोन ठोक्किएको छ। आक्रमणबाट भवन र केही बाल्कोनीहरूमा क्षति पुगे पनि कोही पनि हताहत नभएको मस्को क्षेत्रीय गभर्नर एन्ड्रे भोरोब्योभले बताए । यसबाहेक ड्रोनका भग्नावशेषहरू विभिन्न स्थानमा खस्दा एउटा फिटनेस सेन्टर, औद्योगिक कारखाना, एक सपिङ सेन्टर (जहाँ आगलागी भएको थियो) र एउटा निजी घरमा क्षति पुगेको छ।

यसैबिच, रुसको दक्षिणी क्षेत्र रोस्तोभमा बिहीबार भएको छुट्टै ड्रोन आक्रमणमा परी एक जना नागरिकको मृत्यु भएको छ भने अन्य दुई जना घाइते भएको समाचारमा उल्लेख छ । त्यहाँको आक्रमणबाट एउटा रेलको इन्जिनमा क्षति पुग्नुका साथै दुईवटा व्यावसायिक प्रतिष्ठानहरूमा आगलागी भएको क्षेत्रीय गभर्नर युरी स्ल्युसारले जानकारी दिए।

यसअघि गत मंगलबार पनि सोही रिफाइनरीको मैदानमा युक्रेनी ड्रोनले क्षति पुर्‍याएको थियो । मंगलबारको आक्रमणपछि युक्रेनी राष्ट्रपति भोलोडिमिर जेलेन्स्कीले आफ्नो सेनाले ५०० किलोमिटर टाढा रहेका रुसी सुविधाहरूलाई निशाना बनाउन लामो दूरीका हतियार प्रयोग गरेको बताएका थिए । उनले रुसलाई युद्ध अन्त्य गर्न बाध्य पार्ने रणनीतिका रूपमा यस्ता आक्रमणहरूलाई अघि बढाइएको स्पष्ट पारेका छन् ।

विश्लेषकहरूका अनुसार रुसको राज्य बजेटको कम्तीमा एक तिहाइ आम्दानी तेलको बिक्रीबाट हुने गर्दछ । युक्रेन युद्ध शुरू भएदेखि अमेरिका र युरोपेली सङ्घको कडा प्रतिबन्धका कारण रुसी तेल खरिद गर्ने देशहरूको सङ्ख्या खुम्चिएको छ। यद्यपि, इरान युद्धका कारण विश्व बजारमा इन्धनको मूल्य बढेपछि रुसले केही राहत र आर्थिक लाभ भने पाएको थियो।

तर, युक्रेनले तेल पूर्वाधारमा दैनिकजसो गरिरहेको आक्रमणले रुसलाई ठुलो धक्का दिएको छ। रोयटर्सका अनुसार युक्रेनी आक्रमणका कारण आपूर्ति मार्ग अवरुद्ध भएपछि रुसले सन् २०१४ मा अवैध रूपमा गाभेको क्रिमिया क्षेत्रमा यसै महिनाको सुरुमा तेलको अभाव र ग्यासोलिन रासनिङ (कोटा प्रणाली) लागू गर्नु परेको थियो।

बिहीबारको यो आक्रमण फ्रान्समा आयोजना भइरहेको जी–७ शिखर सम्मेलन र ब्रसेल्समा जारी नेटो रक्षामन्त्रीहरूको बैठककै बीचमा भएको हो। जेलेन्स्कीले मंगलबार अमेरिकी राष्ट्रपति डोनाल्ड ट्रम्पसँग भेटवार्ता गरेका थिए, जहाँ ट्रम्पले युक्रेनको वायु रक्षा प्रणाली सुदृढ गर्ने प्रस्तावलाई सकारात्मक रूपमा लिएका थिए । ट्रम्पले पाँचौँ वर्षमा प्रवेश गरेको यो युद्ध अन्त्यका लागि रुसलाई सम्झौता गर्न प्रोत्साहन समेत गरेका छन् ।