गगन–विश्वप्रकाशहरू कांग्रेस नेतृत्वमा प्रवेश गर्न असफल भए के हुन्छ ?

नेपालको राजनीति आज एक अप्ठेरो मोडमा आइपुगेको छ । यो मोड सतहमा देखिने सत्ता र शक्ति–गणितको परिवर्तन मात्र हैन, एउटा पुस्ता, एक युग र एउटा पार्टीको भविष्य तय गर्ने निर्णायक मोड हो । खासगरी, नेपाली कांग्रेस जस्तो ऐतिहासिक, विचारधरिका रूपमा उदारवादी र लोकतान्त्रिक मूल्यहरूको संरक्षक मानिने पार्टीले यो मोडमा आफ्नो नेतृत्व संरचना नयाँ पुस्तातर्फ सर्न सक्दैन भने त्यसले ल्याउने राजनीतिक–सामाजिक परिणाम गम्भीर हुने स्पष्ट संकेतहरू देखिएका छन् । भदौको जेनजी बिद्रोहपछिको रापतापमा यदि गगन थापा र विश्वप्रकाश शर्माहरू काँग्रेसको नेतृत्वमा स्थापित हुन सकेनन् भने नेपालको भविष्य के हुन्छ ? काँग्रेसको यात्रा कहाँ पुग्छ ? र देश कुन बाटोतर्फ मोडिन्छ ?

नेपाली काँग्रेसले आफ्नो जीवनमा धेरै पटक सबैभन्दा कठिन संक्रमणहरू व्यहोरेको छ । राजतन्त्रको नियन्त्रण, पञ्चायती दमन, भूमिगत संघर्ष, ०४६ को जनआन्दोलन, २०६२र६३ को क्रान्ति, यी सबैले काँग्रेसलाई ऐतिहासिक गहिराई र वैचारिक उचाइ दिएको छ । तर विडम्बना के हो भने, यति धेरै परिवर्तनसहित इतिहासको धारो मोडे पनि काँग्रेसले पार्टीको आन्तरिक संरचना भने परिवर्तन हुन चाहँदैन जस्तो देखिन्छ । नेतृत्व अझै पनि पुरानै पुस्ताको कब्जामा छ, जसले आफूहरू चाहिँ निरन्तर ‘संरक्षक’ र ‘अनुभवी’ भनेर व्याख्या गर्छ अनि नयाँ पुस्तालाई निर्णय–निर्माण तहमा ल्याउन निरन्तर अनिच्छुक देखिन्छ ।