औद्योगिक क्षेत्रमा विद्युत् काट्ने र उद्योगीलाई धरपकड गर्ने तयारीप्रति महासंघको आपत्ति

काठमाडौं । नेपाल उद्योग वाणिज्य महासंघले औद्योगिक क्षेत्रभित्रका उद्योगहरूको विद्युत् लाइन काट्ने र उद्योगीहरूलाई धरपकड गर्ने तयारी गरिएको भन्दै सरकारको गम्भीर ध्यानाकर्षण गराएको छ । औद्योगिक क्षेत्र व्यवस्थापन लिमिटेडद्वारा सञ्चालित १० वटा औद्योगिक क्षेत्रका करिब ७०० उद्योगहरूमाथि प्रशासनिक बल प्रयोग गरिनु कानुनी राज्य र व्यावसायिक शिष्टाचार विपरीत रहेको महासंघको ठहर छ ।

औद्योगिक क्षेत्रको जग्गा भाडा वृद्धिको विवाद हाल सर्वोच्च अदालत र उच्च अदालतमा विचाराधीन रहेको छ । औद्योगिक क्षेत्र व्यवस्थापन लिमिटेड आफैँले अदालतको फैसलाउपर पुनरावलोकनको मुद्दा दायर गरेको अवस्थामा, उद्योगीहरूलाई सात दिनको छोटो अवधि दिएर बक्यौता तिर्न ताकेता गर्नु न्यायसंगत नभएको विज्ञप्तिमा उल्लेख छ ।