युद्धविरोधी रुसीलाई मतदान गर्न याशिनको आह्वान

निर्वासित रुसी विपक्षी नेता इल्या याशिनले यही महिना हुने विधायी निर्वाचनमा राष्ट्रपति भ्लादिमिर पुटिनको सत्तारूढ दल ‘युनाइटेड रसिया’ विरुद्ध मतदान गर्न विश्वभर रहेका युद्धविरोधी रुसी नागरिकलाई आह्वान गर्नुभएको छ ।

सेप्टेम्बर २० को दिउँसो मतदान केन्द्रमा पुगेर सत्तारूढ दलविरुद्ध मतदान गर्न आग्रह गर्दै उहाँले युद्धको विरोध जनाउन सामूहिक मतदान अभियान सञ्चालन गरिएको बताउनुभयो । युद्धविरोधी रुसी नागरिक एकै समयमा मतदान केन्द्रमा पुगेर लामबद्ध भए आफू कति सङ्ख्यामा छन् भन्ने विश्वले देख्न सक्ने उहाँको भनाइ छ । निर्वाचनको नतिजामा भने कुनै शङ्का नरहेको उहाँले बताउनुभयो ।