सीपयुक्त युवा, उत्पादनमुखी अर्थतन्त्र र डिजिटल प्रदेश : गण्डकी बजेटको नयाँ लक्ष्य

पोखरा । हिमालका उकाली–ओरालीमा परम्परागत घुम्ती गोठ प्रणालीमा पालिँदै आएका चौपायदेखि शहरका डिजिटल सेवासम्म - गण्डकी प्रदेश सरकारले आगामी आर्थिक वर्ष २०८३/८४ को बजेटमार्फत विकासको नयाँ खाका अघि सारेको छ । प्रदेशको आर्थिक समृद्धि, रोजगारी सिर्जना र नागरिकलाई सहज सेवा उपलब्ध गराउने लक्ष्यसहित सरकारले ३२ अर्ब ९९ करोड ९९ लाख रुपैयाँको बजेट सार्वजनिक गरेको हो ।

आर्थिक मामिला मन्त्री जीतबहादुर शेरचनले आइतबार प्रदेश सभामा प्रस्तुत गरेको बजेटले विकासलाई मुख्य केन्द्रमा राखेको छ । कुल बजेटमध्ये ६० प्रतिशतभन्दा बढी रकम विकास खर्चतर्फ विनियोजन गरिएको छ । पूर्वाधार निर्माणसँगै उत्पादन, सीप, प्रविधि र रोजगारीलाई जोड दिँदै सरकारले “समुन्नत प्रदेश, प्रभावकारी सार्वजनिक सेवा”को लक्ष्य अघि सारेको छ ।