मुलुकको समृद्धिका लागि नवप्रवर्तन अनिवार्य छ, तर सरकारी प्रक्रिया निकै झन्झटिलो भयो- मन्त्री पुन

काठमाडौं । विज्ञान, प्रविधि तथा नवप्रवर्तनमन्त्री महावीर पुनले मुलुकको समृद्धिका लागि नवप्रवर्तन अनिवार्य भए पनि सरकारी प्रक्रिया निकै झन्झटिलो रहेको बताएका छन् । विनियोजन विधेयक २०८३ माथि प्रतिनिधि सभामा सांसदहरूले उठाएका प्रश्नको जवाफ दिँदै मन्त्री पुनले मन्त्रालय सम्हालेपछिको आफ्नो अनुभव र चुनौती सुनाए ।

सम्बोधनका क्रममा पुनले आफू रहरले नभई देशप्रतिको मायाले यो स्थान (मन्त्री) मा आइपुगेको उल्लेख गरे । “म त यस्तो होइन दाई, पिरतीले जोगी बनायो भन्ने एउटा गीत छ । म पनि यस्तो सांसद हुने, मन्त्री हुने मान्छे त होइन, तर पिरतीले चाहिँ मलाई सांसद र मन्त्री बनायो । मेरो पिरती खासगरी देशसँग बसेको हो,” उनले भने ।