कानूनमन्त्री गौतम र अमेरिकी कार्यवाहक राजदूतबीच शिष्टाचार भेटवार्ता

नेपालका लागि अमेरिकी दूतावासका कार्यवाहक राजदूत स्कोट अर्बम र कानून, न्याय तथा संसदीय मामिला मन्त्री सोबिता गौतमबीच शिष्टाचार भेटवार्ता भएको छ। बिहीबार मन्त्रालयमा भएको उक्त भेटमा द्विपक्षीय सहयोग, कानूनी सुधार तथा लगानी प्रवर्द्धनका विविध विषयमा विस्तृत छलफल भएको मन्त्री गौतमको सचिवालयले जनाएको छ।

भेटका क्रममा कार्यवाहक राजदूत अर्बमले नेपाल सरकारले अघि सारेको शासकीय सुधारसम्बन्धी १०० बुँदे कार्यसूचीमार्फत भ्रष्टाचार नियन्त्रण र सुशासन प्रवर्द्धन गर्ने प्रयासको प्रसंशा गरे। साथै, यस्ता नीतिगत सुधारहरूले अमेरिकी र अन्य विदेशी कम्पनीहरूलाई नेपालमा लगानी गर्न थप आकर्षित र उत्साहित बनाउने विश्वाससमेत उनले व्यक्त गरेका छन्।