एसिड आक्रमणबाट विश्वकपको ऐतिहासिक गोलसम्म : योआने विस्साको प्रेरणादायी यात्रा

काठमाडौं। डेमोक्रेटिक रिपब्लिक अफ कङ्गो (डीआर कङ्गो)का फरवार्ड योआने विस्साले पोर्चुगलविरुद्ध गोल गर्दै आफ्नो देशका लागि विश्वकप इतिहासमा नयाँ अध्याय लेखेका छन्।

ह्युस्टनमा बुधबार भएको समूह चरणको खेलमा २९ वर्षीय न्यूकासल युनाइटेडका स्ट्राइकर विस्साले दोस्रो हाफ सुरु भएको पाँच मिनेटमै कर्नरबाट आएको बललाई हेडमार्फत जाली चुमाउँदै डीआर कङ्गोको विश्वकप इतिहासकै पहिलो गोल गरे।

५२ वर्षपछि विश्वकपमा फर्किएको डीआर कङ्गोका लागि यो क्षण ऐतिहासिक बन्यो।

तर पाँच वर्षअघि विस्साले यस्तो दिन देख्ने कल्पना पनि गरेका थिएनन्। सन् २०२१ जुलाई १ मा उनकी छोरीलाई अपहरण गर्ने प्रयास गरेकी एक महिलाले घरको ढोका खोल्नेबित्तिकै उनको अनुहारमा एसिड प्रहार गरेकी थिइन्।

उक्त आक्रमणबाट उनको आँखामा गम्भीर रासायनिक जलन भएको थियो र तत्काल शल्यक्रिया गर्नुपरेको थियो।

आक्रमणकारीले भोलिपल्ट अर्की महिलामाथि पनि एसिड आक्रमण गरेकी थिइन्। उनलाई पछि पक्राउ गरी सन् २०२५ जनवरीमा १८ वर्षको जेल सजाय सुनाइएको थियो।

आक्रमणपछि विस्सालाई पूर्ण रूपमा निको हुन करिब छ महिना लागेको थियो। त्यसबेला उनी फ्रान्सेली क्लब एफसी लोरिएन्टमा खेलिरहेका थिए।

लोरिएन्टका तत्कालीन प्रशिक्षक क्रिस्टोफ पेलिसिएले बीबीसीसँग कुरा गर्दै भनेका थिए, ‘शारीरिक र मानसिक रूपमा प्रभावित भए पनि योआनेले सफल हुने आफ्नो दृढ संकल्प चाँडै देखाएका थिए। उनको सबैभन्दा ठूलो विशेषता कहिल्यै हार नमान्ने स्वभाव थियो।’

उनका पूर्व टीममेट पिएर–इभ हामेलले पनि विस्साको प्रशंसा गरेका थिए। ‘आक्रमणपछि उनले कहिल्यै गुनासो गरेनन्। उनी तुरुन्तै अगाडि बढ्न चाहन्थे। आजको सफलता उनको अथक प्रयासको उचित प्रतिफल हो,’ उनले भने।

विश्वकपमा पोर्चुगलसँग १–१ को बराबरी खेल्दा विस्सा आफ्नो देशका प्रमुख नायक बने। खेलमा पोर्चुगलका लागि जोआओ नेभेसले गोल गरेका थिए।

यसअघि खेल सुरु हुनुअघि पोर्चुगलले गत वर्ष कार दुर्घटनामा ज्यान गुमाएका आफ्ना पूर्व टीममेट डियोगो जोटालाई श्रद्धाञ्जली अर्पण गरेको थियो। रंगशालाको स्क्रिनमा जोटाको तस्बिर प्रदर्शन गरिएको थियो भने खेलाडीहरूले उनको नाम लेखिएको हातमा बाँध्ने पट्टी लगाएका थिए।

‘त्यो मेरो जीवनकै दुःस्वप्न थियो’

फ्रान्समा चलेको अदालतको सुनुवाइका क्रममा विस्साले एसिड आक्रमणको भयावह अनुभव सुनाएका थिए।

उनका अनुसार एसिड अनुहारमा प्रहार भएपछि उनकी पत्नीले तुरुन्तै आपत्कालीन सेवामा फोन गरेकी थिइन्। चिकित्सकको सल्लाहअनुसार उनले लगातार पानीले आँखा पखालेका थिए।

‘अस्पतालमा पुगेपछि डाक्टरहरूले मेरा आँखाहरू जलेको बताए। प्रत्येक घण्टा आँखा सफा गर्नुपर्थ्यो। त्यो मेरो जीवनकै दुःस्वप्न थियो,’ विस्साले अदालतमा भनेका थिए।

‘त्यसपछि कुनै आवाज सुन्नासाथ म झस्किन थालेँ। मेरा बच्चाहरू सुरक्षित छन् भन्ने कुरा नै मलाई अगाडि बढ्ने शक्ति बन्यो। दुवै आँखाको शल्यक्रिया भयो र डाक्टरले जीवनभर आँखा झार्ने औषधि प्रयोग गर्नुपर्ने बताए। दृष्टि पूर्ण रूपमा फर्किन छ महिना लाग्यो।’

उनले समयमै उपचार नपाएको भए अवस्था अझ गम्भीर हुन सक्ने बताए।

आक्रमणपछि पनि विस्साले हार मानेनन्। उपचारकै क्रममा उनले ब्रेन्टफोर्डसँग चार वर्षको सम्झौता गरेका थिए र पछि न्यूकासल युनाइटेड मा पुगे।

तर शारीरिक घाउ निको भए पनि मानसिक पीडा अझै बाँकी रहेको उनले स्वीकारेका छन्।

‘म पहिलेभन्दा धेरै एक्लो भएको छु। अपरिचित मानिसहरूको बीचमा सहज महसुस गर्न सक्दिनँ,’ उनले भने।

‘पहिलेझैँ भावना व्यक्त गर्न सक्दिनँ। सडकमा हिँड्दा पनि पछाडि फर्केर हेर्ने बानी परेको छ। राति एक्लै हुँदा निदाउन सक्दिनँ।’

उनका साना छोराछोरीले अनुहारका दागबारे सोध्ने गरेको तर उनीहरू अझै सानै भएकाले सत्य बताउन नसकेको विस्साले बताए।

‘डाक्टरहरूले अनुहारको शल्यक्रिया गर्ने प्रस्ताव गरेका थिए, तर मैले अस्वीकार गरें। यी दागहरू मेरो जीवनको इतिहास हुन्,’ उनले भने।

एसिड आक्रमणको पीडा, मानसिक आघात र लामो पुनःस्थापनाको यात्रापछि विश्वकपमा देशको पहिलो गोलकर्ता बन्नु योआने विस्साका लागि मात्र होइन, सम्पूर्ण डीआर कङ्गोका लागि प्रेरणादायी उपलब्धि बनेको छ।